Aprè 9 jou nan vantilasyon mekanik ak 29 jou ospitalizasyon, yon premye pasyan Kowonaviris sòti nan koma aprè yo te fin mete yon aparèy depi plizyè jou, li reyisi kite nan bèl rad li, bab li byen raze, lajwa ak lavi sou vizaj li nan Lopital Inivèsitè Mibalè a mekrèdi 5 dawout pase a. Tchalenj sa ekip medikal Lopital Inivèsitè Mibalè a reyisi l aprè yo fin pran 10 echèk. Se sèl pasyan ki entibe ki te nan aparèy ki sòti vivan nan yon lopital nan peyi Dayiti.
« Jodi a mwen kontan, mwen pral kite lopital la, fanmi m vin chache m. Mwen trè byen nan po m. Mwen fre tankou yon kola 15 », se nan yon vwa fèm Fritzner pasyan 60 an sa ki prèske sòti nan lanmò ki retounen nan lavi fè konnen. Daprè li menm, se gras ak dinamis ak konpetans ekip medikal Lopital Inivèsitè Mibalè a. Fritzner di li pa gen mo pou eksprime gratitid li. « Map adrese remèsiman m ak tout ekip medikal la espesyalman doktè Pierre. San yo mwen pa t ap ka anvi », daprè sa Frtizner t ap di pandan l eksplike aprè l fin santi premye sentom yo li reprann konesans nan Lopital Inivèsitè Mibalè a.
World
