Nan yon kominike ki parèt madi 4 dawout 2020 an, Gouvènman Ayisyen an fè konnen li pè yon dezyèm vag pandemi nouvo Kowonaviris la nan peyi a. Fas ak ris sila, madi 4 dawout pase a, gouvènman an di l te gen yon brase lide ak komite ki la pou jere Kovid-19 la, Selil Syantifik ak Komisyon Miltisektoryèl ki te mete kanpe pou kwape Kowonaviris la sou tout tèritwa peyi a. Aprè rankont sila, otorite yo deside pou reprann ak mobilizasyon kont pwopagasyon Kowonaviris la sou tèritwa nasyonal la. Otorite yo lanse nan okazyon sa yon alèt wouj epi egzije yon fwa ankò pou tout moun respekte mezi baryè yo.
Daprè sa ki parèt nan kominike sa, aprè yon gwo reyinyon ki fèt ant Chèf Gouvènman an ak tout antite ki la pou jere Kowonaviris la, Ministè Kilti ak Kominikasyon te gen enstriksyon pou li pran tout dispozisyon nan lide pou alète popilasyon an sou danje pandemi nouvo Kowonaviris la reprezante pou peyi a.
Pandanstan, daprè dènye bilan Ministè Sante Piblik ak Popilasyon mete deyò, gen 21 nouvo ka moun ki konfime ki gen Kowonaviris nan peyi Dayiti. Daprè MSPP, pou dat jodi a, peyi Dayiti gen ofisyèlman 7 532 ka moun ki trape Kowonaviris, 171 moun ki te gen Kowonaviris ki jwenn lanmò yo ak 4 832 pasyan Kowonaviris rive jwenn gerizon depi lè maladi a rantre nan peyi a.
Foto: MSPP
World
