Ministè Sante Piblik ak Popilasyon (MSPP) revele ka kowonaviris ki anrejistre yo fèb anpil depi fen mwa dawout pase a. Chak jou ki jou nonb ka moun ki kontaminen nan kowonaviris yo ap desann pou rive nan pi ba kantite nou pa janm konnen depi 5 mwa sitou dat 19 mas 2020 kote nou te gen 2 premye ka yo.
Doktè Jean William Pape ki t ap reponn keksyon kèk jounalis madi 25 dawout pase a di nou poko ka kriye viktwa nan zafè kowonaviris la. Chif kantite moun ki pran kowonaviris la k ap bese a tanzantan ka twonpe nou paske li reflete sèlman ka moun ki sispèk epi teste. Sa pral remoute ankò daprè previzyon Doktè Pape.
Doktè Pape k ap dirije ak Lauré Adrien Komisyon Jesyon Pandemi Kowonaviris la fè konnen anplis kowonaviris la gen grip ki rele enfliyennza a ki tanmen anrejistre an Ayiti.
«Anplis kowonaviris la gen enfliyennza. Nou anrejistre plizyè ka enfliyennza. Nou poko konnen kòman moun yo pral reyaji ak doub enfeksyon sila. Se moman pou nou pwoteje nou fòk nou pridan. Jès baryè yo itilize kont kowonaviris la kapab pwoteje nou kont grip enfliyennza a», pawòl Chèchè William Pape ki ensiste sou 2 nosyon sila yo pridans ak pwoteksyon nenpòt kòman.
Madi 25 dawout pase a Premye Minis Joseph Jouthe nan yon rankont atravè platfòm Zoom te chita pale ak aktè yo ki enplike nan jesyon pandemi kowonaviris la nan peyi a. Chèf gouvènman an te souliye nesesite ki pa ka tann ki genyen pou fè tout moun respekte jès barye yo.
« Nou gen anpil enkyetid paske moun yo nan popilasyon an pa respekte règ sanitè yo. Paske pandemi kowonaviris la pa gen gwo enpak sou Ayiti popilasyon an pa fè atansyon. Sa k ap retounen kont nou nan moman lekòl la relouvri pòt li depi kèk semenn lan », se sa Doktè William Pape presize pandan li di toutotan ipotèz pou gen yon dezyèm vag pa ekate fòk nan mezi nou kapab tout moun respekte mezi jès baryè yo. Pou koulye a, daprè sa doktè a ajoute, plizyè peyi nan kontinan ewopeyen an ap eksperimante yon dezyèm vag nan kowonaviris.
World
