Nan yon kominike ki pote siyati premye minis ayisyen an Joseph Jouthe nan dat 30 avril pase a, li ekri gouvènman repiblik la fè obligasyon ak tout moun gason tankou pou yo pòte yon mas (kachnen) nan tout espas piblik yo, apati lendi 11 me 2020 k ap vini la pou rive yon tan yo poko konnen.
Anplwaye nan travay yo, chofè kamyon, taksi, motosiklèt, pasaje transpò piblik (wout, lanmè, espas), tout sitwayen k ap mache nan lari, sou plas piblik yo, nan mache oubyen nan tout lòt espas piblik, tout moun ki prale lopital, nan magazen, labank epi nan tout enstitisyon piblik yo ak prive yo se tout kategori moun sa yo ki konsène pa mezi sa yo ki, selon gouvènman ayisyen an, pran nan lide pou goumen kont Kowonaviris la pou anpeche li simaye toupatou.
Kominike a di aklè tout moun ki kanpe anfas mezi sa yo sijè pou tonbe anba sanksyon, selon sa ki gen pou wè ak Lalwa.
Gouvènman ayisyen an atravè kominike sa siyale Ministè Enteryè ak Kolektivite Tèritoryal ak Ministè Jistis ak Sekirite Piblik enfòme sou mezi sa yo ki pran pou yo fè respekte desizyon sa.
“Se referans ak sikilè nimewo 001 nan dat 25 mas ki lye ak egzekisyon arete 19 mas 2020 an ki te deklare eta dijans sanitè sou tout espas tèritwa nasyonal la pou yon peryòd yon mwa kote yo ta pral pran ankò menm arete sa 20 avril 2020, tout ayisyen pral dwe fòk yo pote mas nan espas piblik yo apati 11 me”, ou kapab li nan kominike sa.
World
